Անտառային լանդշաֆտների ՎԵՐԱԿԱՆԳՆՈՒՄ

Վերականգնում

ԱՄՆ անտառային ծառայությունը (USFS) աջակցել է FPWC-ին Հայաստանում տեղական տեսակների առաջին տնկարաններից մեկի հիմնման գործում, որտեղ կիրառվում է տնկիների փակ արմատային համակարգով աճեցման տեխնոլոգիան։ Այս մեթոդաբանությունը թույլ է տալիս մշակել տեղական այնպիսի ծառատեսակներ, որոնց աճեցումը դժվար է կամ անհնարին՝ Հայաստանում առավել տարածված բաց արմատային մեթոդով։

Մեր միջամտությունն ուղղված է թիրախային տեսակների բնական վերականգնման կարողության հզորացմանը՝ միաժամանակ ստեղծելով կենսամիջավայր, միգրացիոն ուղիներ և սննդի աղբյուր վայրի կենդանիների համար, ինչը կարող է վճռորոշ լինել մարդ-արջ կոնֆլիկտի մեղմման գործում։ Տնկարկները պաշտպանում են հողաշերտը հետագա դեգրադացումից ու կորստից, ինչպես նաև նպաստում են ջրային պաշարների կուտակմանը։ Հիմնվելով վերականգնման «խճանկարային» մեթոդաբանության վրա՝ մեր մոտեցումը ենթադրում է բազմաֆունկցիոնալ լանդշաֆտների ստեղծում։ Դա բնական պաշարների կառավարման դինամիկ, էկոլոգիական համակարգ է, որը վայրի պտղատուների և գյուղատնտեսական լանդշաֆտի համադրման միջոցով դիվերսիֆիկացնում ու ապահովում է կայուն բերքատվություն՝ բերելով սոցիալական, տնտեսական և բնապահպանական օգուտներ բոլոր մակարդակներում հողօգտագործողների համար։

Այժմ ծրագիրն իրականացվում է «World Land Trust» կազմակերպության աջակցությամբ։ Այս նախաձեռնության շրջանակում մինչև 2027 թվականի վերջը մենք կաճեցնենք և կտնկենք ավելի քան 700,000 ծառ՝ վերականգնելով շուրջ 250 հեկտար հողատարածք։